Pero, en que tempos estamos?

Para Tragsa e a Ministerio de Agricultura e Medio Ambiente tirar unha foto dun incendio forestal e publicala nas redes sociais pode implicar a suspensión de emprego e soldo para o bombeiro das BRIF que a realice... Indican que o emprego da cámara do móbil pode producir despistes e perigo. Menuda argumentación chusqueira! Os profesionais implicados saben perfectamente cando facer unha foto - nos tempos de desprazamento ao incendio ou nos descansos, nunca no intre de traballar. O comportamento destes dous entes quere evitar que se coñeza a situación real dos lumes en Galicia, eles controlan, dosifican e cociñan a información que dan aos cidadáns, e das situacións e dos medios que dispoñen os bombeiros para enfrontarse a estas delicadas situacións.
Tragsa e o Ministerio de Agricultura e Medio Ambiente queren que volvamos a tempos anteriores a 1975. Non podemos consentilo.
Poden seguir como traballan os bombeiros das BRIF na páxina Diario de un bombero.

Que paren os verquidos ao río Barbaña!

Xa está ben. Non  podemos seguir permitindo que quen sexa responsable dos sucesivos verquidos que se veñen producindo no río Barbaña quede impune. Todos estes verquidos proceden das inmediacións de San Cibrán das Viñas. A Confederación Hidrográfica Miño-Sil e a consellería correspondente da Xunta de Galicia teñen que tomar cartas no asunto, identificar aos responsables e imporlle as sancións pertinentes que permitan mellorar a situación ecolóxica deste río que cruza Ourense e que, hai anos, disfrutou dunha situación ben distinta e saudable.

Foto José Paz - La Región

"Interesante" titular

Na edición dixital de hoxe de La Voz de Galicia aparece este "interesante" titular. Por que é interesante? Queda nas súas mans...

Aínda non funciona o ERTMS nos Alvia Ourense-Santiago

Pasaron sete meses desde o último artigo e o tema do ERTMS nos Alvia entre Ourense e Santiago segue sen estar resolto. Segundo as declaracións de onte do presidente de Renfe, os grandes problemas técnicos de comunicación entre a vía e os trens está a piques pasar á historia... e quedou tan pancho. Menudo morro!

Renfe incumple o seu compromiso

Segundo lemos en El País, Renfe comprometérase a ter operativo antes de finais do 2013 o sistema ERTMS nos Alvia que empregan a liña de alta velocidade Ourense-Santiago-A Coruña. O xornal informa que, a día de hoxe, aínda non está a funcionar e Renfe non dá ningunha explicación deste incumprimento.
Tamén tería que explicar que pasou co correo-e que lle enviara o xefe de maquinistas de Ourense tempo antes do accidente sobre as deficiencias de sinalización na curva de Angrois.
Coidamos que o presidente da compañía ferroviaria debería dimitir, ou, polo menos, ser cesado xa.

Co polbo a voltas

Semella que en Carballiño teñen unha suxerencia importante para a RAG, que ao cefalópodo de oito tentáculos se lle cambie o nome na nosa lingua, que sexa pulpo. Deste xeito unha festa gastronómica tan enxebre que se celebra en agosto poderíase seguir chamando Festa do pulpo. O argumento esgrimido é que na vila ourensá ninguén emprega a palabra polbo, alí é pulpo de toda a vida. Nós témolo claro: en galego, Festa do polbo;  en castelán, Fiesta del pulpo. Festa do pulpo sería unha mestura das dúas linguas, cousa que na nosa terra só ten un nome...

Prioridades

"Veño da Virxe da Barca, da Virxe da Barca veño, veño de avaliar a perda..." Así é como trata o tema O Carrabouxo no día de hoxe. Simpática visión. A Xunta vén de declarar de emerxencia as obras no Santuario da Virxe da Barca. Está claro que é cuestión de prioridades... Nós, entre o arranxo do santuario e a dotación dos ciruxáns pediátricos necesarios como para manter o servizo de ciruxía pediátrica en Ourense, escolleriamos o segundo. Por razóns obvias. Para o outro hai tempo...

Unha sentenza preocupante despois de once anos

A recente sentenza do Prestige semella preocupante. Máis ou menos significa que cando o próximo petroleiro rompa pola metade non haberá ningún responsable da catástrofe, hai impunidade total. A ver que pasa.... Mentres, a calar e a seguir aguantando o que nos boten enriba, que para iso somos galegos. Mexan por nós e temos que dicir que chove....

O presidente e os impostos á Igrexa Católica

Feijóo sentenza que o cobro de impostos á Igrexa "non lle interesa a ninguén"(praza.com)

A min interésame, e moito. A moita xente tamén lle interesa. Se somos algúns, xa non somos "ninguén".
Xa está ben de aproveitarse dunha situación cuasi predemocrática trinta anos despois. É preciso suspender os acordos co Vaticano e democratizar esta situación.

O incendio na fraga do Eume

Esta temporada tan atípica desde o punto de vista meteorolóxico trouxo como consecuencia unha nova vaga de incendios. Seguimos igual. As galegas e os galegos semella que non damos respostas axeitadas ao problema dos incendios. Incendios que, ademais de arruinar a terra e o clima levan por diante vidas de persoas como sucedeu en Castrelo do Val. Agora, o incendio na fraga do Eume está a causar unha profunda ferida e grande degradación nunha paraxe ecolóxica protexida por seren un ecosistema bastante ben conservado e moi variado en canto á flora e fauna. Lembramos que hai anos, coa declaración de parque natural, houbo certos problemas na zona, como que había certa resistencia e presión contra a declaración de espazo protexido. Agora déronse as circunstancias ideais para que xurdira a catástrofe: seca, falta de humidade na atmosfera, vento... e uns medios de combate dos lumes que están en horas baixas debido, sobre todo, aos recortes económicos. Non sabemos se houbo ou non descoordinación entre os medios diferentes medios de extinción. Desde logo que pensamos que o monte protéxese no inverno. As subvencións que antes se daban aos concellos para limpar os bosques desapareceron por mor da crise. Desexamos que o incendio se apague o máis axiña posible, que se investiguen as causas do mesmo, se actúe contra os culpables (se é un lume provocado) e tómense todas as medidas necesarias para paliar os efectos negativos que vai sufrir a zona, desde os medioambientais ata os económicos, referidos estes ás perdas que xerará o impacto no turismo.

Reflexións arredor da folga xeral

Neste día de folga xeral xurden reflexións coma:

• O fartos que estamos de escoitar dos empresarios e membros do goberno a frase "A folga xeral non crea emprego". Semella un mantra. O que está claro, con datos do propio goberno, é que a reforma laboral, nun primeiro momento, vai xerar 650.000 parados máis...
• O aumento do estado policial. Que sexa o Ministerio de Interior quen informe da marcha da xornada de folga xa é todo un síntoma (a folga, un dereito constitucional tratado como un conflito de orde público). Que as rúas amosen unha excesiva presenza policial para "garantir" o dereito a traballar dos que o queiran facer (pero non hai quen garanta o dereito dos traballadores a facer folga  en empresas onde o empresariado "presiona", "coacciona" de xeito directo ou sibilino aos empregados).
• É unha mágoa que en Galicia os sindicatos non convocasen manifestacións unitarias, visto a grande participación dos traballores e traballadoras nas mesmas. A unidade fai a forza; unidade imprescindible para defendernos ante a gravidade das medidas contra os dereitos dos traballadores que esta reforma laboral supón.
• As ganas dalgúns dirixentes empresariais en fixarse, esaxerar e xeralizar as accións de determinados grupúsculos violentos, que non teñen nada que ver cos sindicatos, para desacreditar aos milleiros de cidadáns que participaron nos actos desta xornada dun xeito totalmente respectuoso cos valores democráticos.
• A folga é un dereito, e os días previos non é o momento para cuestionarse publicamente sobre este dereito, tal como fixo un destacado membro do goberno.

Por último, queremos felicitar á cidadanía que participou de xeito activo nesta xornada. Cada un cunha situación laboral distinta, pero todos na rúa para defender o equilibrio nas relacións laborais que tantos anos e esforzos custoulles ás xeracións anteriores.

Un libro fronte unha porra

Os estudantes do Instituto Luis Vives de Valencia estaban a protestar porque, debido aos recortes da Generalitat Valenciá, quedaron sen calefacción. Cada un deles tiñan que levar unha manta para poder aguantar a friaxe das clases (estamos no século XXI?). Desenvolveron unha protesta pacífica, non romperon nada, só cortaron o tráfico dalgunha rúa. A policía, en vez de conter, de negociar, de convencer, de "comprender" a situación, empregaron a forza bruta e dun xeito desproporcionado zurraron á mocidade. Isto foi a faísca que provocou o incendio. Onte, volveron perder os papeis: desde o xefe da policía tratando de "inimigos" aos rapaces, pasando pola Delegada do Goberno que cala ata chegar a algúns policías que no seu facer extralimitáronse (como ese famoso vídeo no que un policía empurra violentamente a dúas mozas contra un coche).
Desde aquí, queremos amosar a nosa solidariedade con eses mozos e esas mozas que están defendendo o seu dereito a recibir unha educación pública nas mellores condicións posibles, que antepoñen os libros fronte as porras, que están sufrindo nas súas carnes os rigores dunha "nova" política para manexar o orde público...
Animamos ao profesorado do centro a defender o seu estudiantado, que os protexa, que mostre comprensión e solidariedade con eles.
Animamos ás nais e pais dos estudantes maltratados a interpoñer as denuncias oportunas contra os axentes  que actuaron dun xeito desmesurado e inapropiado contra os seus fillos, moitos menores de idade, ou contra os mandos e políticos responsables destes feitos.
É así como vai ser a política de orde público deste goberno? Volveremos aos tempos dunha policía "gris"? Que pretenden, meter medo aos cidadáns ante a que se aveciña?

Campaña contra os sindicatos

Desde que o goberno do PP aprobou a reforma laboral (convocando de palabra o seu presidente á folga xeral) este, encabezado pola vicepresidenta quen a tomou cun sindicalista da UXT membro do Consello de Bankia e seguido pola panda mediática da dereita máis rancia, cabeceiras xa todos temos en mente, parece que a campaña antisindical arrecia...
Arreciou esta fin de semana coas manifestacións de milleiros de traballadores e traballadoras deste país convocados pola UXT e CCOO. Hoxe luns, veñen eses medios ben sementados... de auténticas barbaridades desde os titulares, os editoriais ata os artigos de opinión... ("El carnaval de los parásitos y sus comparsas" Gaceta Digital) ou ("El mensaje sindical: Ahora, a tomar cervezas" La Razón)...
Nesta situación e tal como están as cousas, os sindicatos son máis necesarios que nunca. Desde aquí pedímoslles que escoiten as voces dos traballadores, que consigan unidade de acción entre todos os sindicatos, que defendan estas reivindicacións con todos os recursos que o noso sistema democrático permite... Esta reforma laboral desequilibra a balanza deixando en situación desprotexida ao máis débil: o traballador.

Recortes en educación... por José Mota

Sen palabras...

O ferrocarril en Galicia no 2011

No ano 2011 o ferrocarril foi noticia en Galicia. Desde decembro gozamos dunha liña de AVE entre Ourense - Santiago - A Coruña que comunica estas tres cidades en tempos propios da Europa máis avanzada. Pero os políticos seguen a xogar, peor ca nenos, co famoso AVE a Galicia, ese tremendo tramo (por inversión e dificultade técnica) entre Ourense e a Meseta. Dicimos que seguen a xogar porque se dedicaron, e seguen nesta tarefa, a botar en cara uns aos outros os prazos, as licitacións, os tempos, as características, que se hai que soterrar tal estación... Os que botaban en cara que o AVE non chegaría no 2015 agora, que están no goberno, afirman que tardará máis, no 2018, porque... porque... a verdade é que coidan que non sabemos ben o motivo. Os que crearon aquel esperpento de Plan Galicia, que só era cartelería e fume sen ningunha previsión de orzamento, que machacaron aos ministros do goberno de Zapatero, que lle botaron en cara a Blanco, o mellor ministro para Galicia nese tempo, que non ía chegar o AVE a tempo, que lle dicían que non invertía, que non se licitaban tramos, pasaron a criticar que se licitase en época postelectoral e agora veñen coas tesoiras e probablemente nin chegue no 2018... claro, sempre queda o recurso de botarlle as culpas ao gobernantes anteriores... Nada, pensamos que non lles debemos otorgar nin un gramo de confianza!
Sempre nos quedará esa romántica imaxe do ferrocarril a vapor. Sirva como exemplo este fermoso vídeo emitido no concerto de Aninovo 2012 desde Viena, coa orquetra Filharmónica.
Un desexo: que o noso ferrocarril non quede nun tren turístico...

Ai que ver!

O home dos "hilitos de plastilina" chama ao home de "seguro que no el fuel no toca la costa gallega". Vivir para ver!

Xornal.com desconectado para sempre

Rematou a singladura na rede de XORNAL.COM É posible que a hemeroteca dixital que durante 13 anos de vida foi creando este medio desapareza para sempre.
Unha mágoa para o xornalismo, unha mágoa para o galego... Estamos "fastidiados".

Patética inoperancia...

Poden xulgar as declaracións do conselleiro de Medio Rural ao xornal El Pais sobre os incendios en Ourense destes días. Resumo: ter o dobre de brigadistas que o ano pasado por estas datas (que case non había ningún contratado porque o tempo foi o normal nesta época) significa que se poñen os medios necesarios para sofocar esta vaga de incendios, que como podemos comprobar está fóra de control. É máis: o conselleiro, responsable desta política inoperante, permítese o luxo de "esixir" ao goberno central que deteña a máis incendiarios... Mentres, material antiincendios está parado porque non hai persoal para movelo. Como se non fixese falta!!!
Aforrar, aforrará a consellería... mais o desastre ecolóxico notarémolo durante moitos anos, non só estes días sufrindo este aire irrespirable...

Afumados en Ourense... e algo máis

Estamos afumados. Os tellados, terrazas e rúas aparecen cheas de cinza. A respiración faise insoportable polo cheire a queimado. A barbarie dos incendios forestais na nosa provincia continúa. Por que non aparecen estes días incendiarios detidos?
A incompetencia da Xunta aumenta por momentos. A unha situación meteorolóxica adversa pola seca e as altas temperaturas, engádese unha política desnortada, cuxo único sentido é aplicar a tesoira en todo e deixar, entre outras cousas, ás brigadas contra o lume con poucos efectivos, porque hai que aforrar en soldos ao persoal!!! Menos mal que temos por aquí á Brigada de Emerxencias do Exército, maquillando a inoperancia da administración galega.
Desexamos que os galegos e as galegas decidamos nas próximas eleccións autonómicas realizar unha optimización de recursos (expresión que ultimamente emprega o conselleiro de educación para referirse aos recortes de profesorado na escola pública) e mandar á oposición a este goberno que, nos dous primeiros anos, se dedicou a desmontar todo o bo que o bipartito realizara e agora, coa crise económica e a financiación autonómica como excusas, está a desmontar o estado de benestar que entre todos sostemos, a desprestixiar os servizos públicos e a potenciar a xestión privada dos mesmos. A cidadanía dase conta disto porque na súa vida diaria está vivindo esta perda de calidade. Mentres, asiste atónita ao infantil espectáculo que dan os nosos políticos ante quen é o responsable do desmantelamento das caixas galegas e de que os seus anteriores directivos se levasenn uns "cuantos" millóns que son dos aforradores, por fundilas coa súa nefasta xestión. Estamos verdadeiramente fartos do "e ti máis". Lamentable!!!

Catástrofe ecolóxica na Baixa Limia

Este é o estado do encoro de As Conchas, no río Limia. As algas cianofíceas multiplicáronse por millón ao ter abundante materia orgánica na auga (contaminación humana, purines...) xunto coa seca e a subida de temperatura da auga pola calor. O resultado é a xeración de olor (que podería chegar a crear gases tóxicos), a contaminación das augas que as fan perigosas para animais e seres humanos (prohibido o baño e o emprego da auga) e as consecuencias económicas para a Baixa Limia que perde unha fonte fundamental de ingresos, cal é o turismo que disfrutaba da fermosas paisaxe e da auga do encoro.

A SGHN de Ourense leva trece anos denunciando este feito e nunca recibiu ningunha contestación por parte da administración. Este ano chegouse a unha situacion límite. Ante este panorama semella que as administracións (Confederación Hidrográfica Miño-Sil, Xunta e MARM) esperan que veñan as chuvias de outono para que solucionen o problema (é o máis económico e o que implica menos esforzo). Parece que as autoridades se limitan a realizar análises e medio informar da situación. Non queren solucionar o problema, é dicir, ir ás causas e investir en medidas de depuración das augas residuais das vilas, en esixir ás granxas un tratamento de purines correcto, en planificar mellor a implantación das industrias gandeiras...

O tempo pasa e a degradación medioambiental desta fermosa zona de Ourense, moi preto do Parque Natural do Xurés, debería quitarlle o sono ás autoridades competentes e mudar así a súa nefasta actitude. 

A nosa solidariedade con todos os veciños e veciñas da Baixa Limia.