O Concello de Ourense vai aprobar a primeiros de setembro unha nova ordenanza de limpeza. Nela aprecen as condutas que se consideran faltas, a tipificación das mesmas e as respectivas sancións. Parécenos moi ben, a ver se así se consigue que a nosa cidade sexa cada vez máis limpa e libre de cheiros.
Se vostedes camiñan un sábado ou un domingo á mañá polas rúas próximas á zona vella, máis en concreto pola zona dos viños, poden experimentar sensacións olorosas propias dun urinario que estivese moi concurrido a altas horas da madrugada. A rúa do Paxaro, ou preto da camisería que hai no inicio da rúa de Paz, case na Praza do Ferro, son lugares fedorentos. Vai haber policías locais a esas horas para sancionar como é merecente esas condutas? Déanse conta que entre os usuarios desas rúas figuran os turistas que, de seguir así esta situación, van levar unha impresión cheirífera da nosa cidade. Ademais de tomar medidas coercitivas contra os mexóns maleducados, sería moi saudable que ás mañanciñas baldearan esas rúas con mangueiras ou cun camión cisterna, apuntando con bo ollo ao sitio onde se xunta a fachada coa beirarrúa para sanear todo dun xeito apropiado e así disfrutar do noso casco vello sen malos cheiros. Oxalá!
3 comentarios:
O mesmo acontece en Pontevedra os sábados e domingos pola mañá. Rúas anegadas de ouriños e lixo por tódalas partes. A decisión tomada polo consistorio pontevedrés foi habilitar un "botellódromo" fóra do casco histórico, no Parque Rosalía de Castro. Os resultados que apreciei para min foron satisfactorios
Mmmmm non me fio... o mesmo dixo coa campaña canciño, pero eu non vexo aos cans con bozais, nin que todos recollan as suas "kk´s", nin que se controle os cans tipificados como "perigosos", nin que se respeten as zonas onde esta prohibido levalos,tampouco vexo aquela vixilancia que ian poñer para facer cumprir a normativa e ata incluso sancions economicas.
Naaaada cheirame todo tan fedorente coma as ruas moito bla bla bla. Xa se verá.
Un saudo.
Ten razón... Nas rúas ourensás hai cada vez máis cagadas de can. O que pasa é que en todo colectivo hai xente que non cumpre as normas establecidas, pero hai moita máis que son bos cidadáns.
Publicar un comentario