Para que serve o galego?

Este é o artigo número 100 en DeTodoUnChisco. E como non, trata sobre o apoio que lle debemos á nosa lingua nai, o galego.

Para que serve o galego? Nós témolo moi claro. Mirade este vídeo realizado pola Asociación de Veciños A Cutareira de Torás- A Laracha...

Terá cara?

Nunha entrevista publicada hoxe, un político con responsabilidade de goberno na administración galega afirma con rotundidade que hai un ataque ao ensino público que non se recorda en Galicia... Terá cara? Pero, non serán as súas polémicas decisións as que están protagonizando ese ataque? Tómanos por parvos?

Parabéns, Sr. Barreiro...

Xa era hora! Por fin, o presidente da RAG, Sr. Barreiro, amosa ante Feijoo e demais políticos a súa opinión sobre o conflito lingüístico que este goberno, máis ben desgoberno de desmantelamento do benestar galego, vén creando desde a campaña electoral. Ademais, este movemento que empeza a aflorar dentro do PP coruñés e vigués meténdolle présa ao goberno galego para que afogue dunha vez por todas ao galego pode que precipitara a acción de Barreiro.
Pensamos que quizais sexa un pouco tarde e que a opinión do Presidente da RAG debeu chegar á sociedade moi antes, por exemplo, antes da "famosa" enquisa aos pais dos alumnos de ensino obrigatorio.
Parabéns, Sr. Barreiro, por exercer o dereito a liberdade de expresión diante da persoa que está a cometer o erro máis grande en contra dunha das señas de identidade máis importantes da nosa terra: a lingua propia.

Noraboa, Contador

Un bo ciclista, nunha forma impresionante durante este Tour 2009, dominou a carreira, gañou nos momentos clave e soubo facerse líder do seu equipo que poderiamos chamar bicéfalo.

Segundo as súas declaracións houbo dúas loitas: na carreira e nos hoteis. Imaxinamos o que tivo que sufrir o corredor español cando o director e case todos os compañeiros apoiaban a Armstrong como líder. Lance suporía un puntazo en todos os aspectos como gañador do Tour. Pero a estrada e o estado de forma pon a cada un no seu lugar. Noraboa Contador!

Pensamos que incluso ata á organización da carreira francesa non lle facía gracia o ciclista español, senón, a que vén ese erro monumental co himno español no caixón de gañadores?

Por certo, a nós seméllanos "raro" ese xesto de pistoleiro que fai Contador cando recibe os trofeos. Parécenos totalmente incongruente con esa imaxe de humildade e sinxeleza que o ciclista pretende dar.

Bombeiros

Lembrámonos da vaga de incendios que asolou Galicia hai tres anos. Moitos bombeiros doutras comunidades achegáronse aquí para axudar ás brigadas galegas.

Queremos amosar a nosa solidariedade coas familias e os compañeiros e amigos dos seis bombeiros que morreron coas botas postas, a pé de incendio estes días en España. Esta perda de vidas humanas e a total destrución que supón un incendio forestal debe facernos a todos "mirar" máis para o monte e enfocar o nosos esforzos para bosques sostibles desde o punto de vista económico coma ecolóxico. O noso futuro depende tamén disto!

Hipócrita...

As persoas que din o que non senten son hipócritas, pero polas súas obras son recoñecidos. Poden elaborar o máis fermosos discursos, pero o día a día pon a cada un no seu sitio e non fai máis que contradicir as súas verbas.

Como podes chamarte galeguista e endosarlle un torpedo destructivo na liña de flotación do galego? Porque, a pesares do que sostén alguén con moito poder (pero que amosa non ter nin idea do campo que ten que administrar) o educativo é un eido preferente para poder soster a nosa lingua viva.

Pola democracia no software. Pola democracia no idioma

Todos os gobernos fan unhas cousas mellor e outras peor. O bipartito tivo os seus fallos mais unha das cousas boas que fixeron foi a de lanzar o centro de software libre Mancomún. Durante os últimos anos Mancomún mantivo actualizados en galego os programas informáticos máis usados como o navegador (Firefox) ou a ofirmática (OpenOffice). O Galinux, un sistema operativo para poder ter a computadora completamente en galego tamén foi unha iniciativa de Mancomún.

Durante a campaña eleitoral o Partido Popular prometeu implantar o software libre, pero agora que están na Xunta ameazan con desmantelar Mancomún, e nós queremos evitalo. Se tí tamén queres que Mancomún continúe funcionando, axúdanos sumándote a esta campaña: clica nesta ligazón para enviarlles agora un correo electrónico.

_________

Nota: esta é unha réplica da nova publicada en ciberirmandade, o luns 13 Xullo 2009, por mor de que A Xunta ameaza con desmantelar Mancomún. nova publicada tamén en ciberirmandade.

Garoña: non decisión

Este ano e pico de lexislatura, Zapatero estase amosando como un político ao que lle custa tomar decisións claramente e na que se está a comportar coma un político máis, do montón... Ese suposto rearme moral do que deu bastantes mostras na pasada lexislatura vese eclipsado nesta por tomar decisicións... ou non tomar decisións "en serio".
Porque se o programa electoral que o levou ao poder contempla o peche das centrais nucleares ao fin da súa vida activa, non se pode decidir pechar Garoña, pero dous anos máis tarde desa data, dentro doutra lexislatura porque dentro de catro anos é posible que o PSOE non goberne en España e o PP podería tomar a decisión (seguro que o fai) de non pechar a central definitivamente.
Semella que dentro do goberno hai unha corrente proclive á enerxía nuclear que convenceu ao presidente para que tomase esta decisión, que non contenta a ninguén. Se queren ser serios, necesítase un debate profundo sobre este tipo de enerxía e, sobre todo, aclarar que facer cos residuos radioactivos que durante milleiros de anos non perderán a súa capacidade devastadora e contaminadora. É preciso lembrar que hai unhas décadas estes residuos lanzábanse alegremente ao océano Atlántico, moi preto de Galicia. Necesítase, pois, un debate sen enganos e obxectivo, que estude a fondo os pros e os contras da enerxía nuclear e que teña en conta a opinión de técnicos, economistas, políticos, e, sobre todo, á cidadanía que, a fin e ao cabo, é a que se vai beneficiar ou vai sufrir as consecuencias do que se decida.
As enerxías renovables son inesgotables e limpas e o noso país ten unhas magníficas condicións en canto a vento e sol... Sigamos investindo neste tipo de enerxía porque ademais dos beneficios para o noso medio ambiente serviríanos para acadar un gran desenvolvenmento tecnolóxico que nos aportaría máis riqueza e máis emprego.

Manifesto: Galego, patrimonio da humanidade

Detodounchisco subscribe unha a unha cada palabra deste manifesto titulado "Galego, patrimonio da humanidade" que pasamos a reproducir:

“Ata hai pouco tempo era un valor compartido, que formaba parte dos consensos básicos sobre os que se articulaba o autogoberno de Galicia, que o idioma galego era merecente dunha especial protección por parte dos poderes públicos. Ese valor partía da subordinación histórica dun idioma que foi sempre o das maiorías populares pero que tamén estivo sempre discriminado ou proscrito, salvo nos períodos en que Galicia e España gozaron da democracia. A liberdade e o dereito ao uso do idioma propio foron historicamente da man. A pretensión de facer crer nunha inexistente imposición lingüística disimula o intento de liquidación do idioma galego e de supremacía do castelán. Os que tal sosteñen queren evitar a presenza do galego nas súas vidas para pecharse en ámbitos en que o castelán sexa o único idioma. Pero Galicia é unha sociedade na que se falan dúas linguas que, non se pode negar, están en situación de desigualdade, polo que o galego debe recibir unha especial protección. Só así se poderá afirmar que se actúa en xustiza e na procura da igualdade entre os dous idiomas.

Esa é a letra e o espírito da Constitución, do Estatuto de Autonomía, e da vixente Lei de Normalización Lingüística. As sentenzas do Tribunal Constitucional así o confirman. Sen embargo, o PP saíu do consenso. Pero gañar unhas eleccións non autoriza a destruír o que é unha das bases da convivencia na nosa sociedade e un dos signos da nosa existencia como país. A sociedade galega que sente aprecio cara a súa lingua -independentemente de cal sexa o idioma no que se expresa usualmente- debe reclamar unha volta do PP a un terreo común. Tamén mostrar o seu acordo coas políticas de afirmación positiva para o idioma galego, que o propio PP impulsou desde a Xunta, e que non buscan senón a súa protección. O idioma de Galicia é un patrimonio da humanidade que debemos custodiar e garantir como medio de comunicación e de creación”.

A desmotorización de Feijoo

Acabamos de escoitar a un conselleiro da actual Xunta de Galicia recoñecer que a meirande parte deses coches oficiais (audis para máis detalles) "inútiles" que van vender foron mercados en tempos de Fraga e Feijjo coma conselleiro.

Despois de todo o follón que se montou na pasada campaña electoral polo "famoso" coche de Touriño, polo despilfarro do goberno bipartito e demais, agora veñen con esta. A verdade, semella que con esta venda hai que xustificar ante os galegos unha campaña electoral tan sucia e escandalosa, baseada, na meirande parte das veces, en medias verdades ou incluso mentiras.

Feijoo decidiuse pola desmotorización. Esixímoslle, pois, que saque a máxima rendabilidade económica desta operación que repercuta na mellora da vida dos galegos e galegas e que non malvenda, seguro que o saberemos se o fai, ese patrimonio mercado con cartos públicos.

Desastre ecolóxico no Barbaña

De neno, moito xogabamos á beira do Barbaña. Desde as típicas carreiras de barcos ata a indios e vaqueiros... Moitas veces acababamos no leito fangoso e asqueroso do río. Que rápido corriamos á casa a lavarnos! Porque, daquela, o Barbaña era unha alcantarilla ou cloaca ao aire libre. Diciamos: o Barbaña, a alcantarilla máis grande de España! Estaba chea de lodos fedentos, augas fecais, ratas... Non había outros sinais de vida animal.
Co paso do tempo, a situación do río foi mellorando. Diferentes actuacións ben encamiñadas posibilitaron que os peixes subisen polo río, que criasen nel, e que aves acuáticas coma parrulos ou pitas de auga anidasen nas súas orillas. O río tiña vida! Incrible! Que boas cousas pode facer o ser humano!
Estes días, un verquido contaminante procedente de industrias do polígono de San Cibrán das Viñas vén de acabar coa riqueza piscícola antes conseguida. Que desastre! O traballo de tantos anos, ao lixo.
Esperamos e esiximos aos organismos responsables e implicados no coidado ambiental do Barbaña a máxima dilixencia e unha investigación a fondo para atopar aos responsables de tal verquido e que o peso da lei e as máximas sancións posibles se apliquen para reparar na medida do posible os danos causados e facer desisitir a esas empresas contaminantes de volver intentar tal despropósito.
Estaremos vixiantes.

O galego, unha barreira idiomática... segundo os actuais gobernantes

O Parlamento Galego vén de rachar coa "barreira idiomática" do galego no acceso á función pública. Tal "fazaña" foi posible grazas a un partido de dereita capitaneado polo seu presidente que, segundo as súas propias palabras, vén de recuperar o consenso lingüístico. Está claro: o coñecemento de varias linguas non é algo desexable, é máis, constitúe unha barreira infranqueable e un impedimento para non escoller aos mellores... Pensabamos que consenso significaba acordar algo, non impoñer unha votación cunha única forza política. Lembremos que a aprobación da Lei de Normalización Lingüística si foi votada polos tres partidos políticos presentes na cámara.
A verdade, témoslle moito que agradecer a esta xente que nos abran os ollos e que aceptemos coa cabeza baixa que o coñecemento do galego non é fundamental para pertencer á Administración Pública Galega. Tamén estámoslle eternamente agradecidos por enviarnos no tempo ao pasado máis rancio obrigando a un galego que empregue a lingua propia de Galicia a mudar de idioma para poder entenderse cun funcionario da Xunta de Galicia e así resolver os seus problemas...
Resoan na nosa memoria palabras do estilo de "...Presidente que non une, que non suma..." xa non lembramos ben como acababa... E isto sóanos que pululou aló polo mes de marzo, máis ben a finais... En só dous meses hai que tragar a propias palabras e algún sapo? Tan cedo?

Onde están os galeguistas do PP?

Onde está ese sector galeguista do PP que non ve con bos ollos o exterminio do galego? Por que cala? Non é o PP un partido democrático? Non permite a opinión dentro do seu partido? Non se pode discrepar en público? O silencio din que otorga. Serán eles tan culpables como os dirixentes do seu partido que están a levar a cabo este "xenocidio" cultural.

Sen o galego, Galicia non é nada.

O Xornal de Galicia

Levo uns meses seguindo as informacións que aparecen en Xornal de Galicia ou no seu espazo web, xornal.com. Penso que por fin temos nas nosas mans e nas pantallas un medio informativo que utiliza o galego e o castelán a partes iguais, un medio que se fai eco das informacións máis importantes que acontecen no noso país e que algunhas, non aparecen noutros medios con máis "sona" e cunha sección de opinión plural e importante en canto ás relevantes figuras que firmas os artigos.
Se non o coñecen, próbeno e comprobarán que hai outra forma de facer as cousas en Galicia.

O contrato da Xunta con Microsoft

A Xunta vén de firmar hai un mes un contrato con Microsoft de 2,2 millóns de euros para a renovación de licenzas de software dese xigante informático. Semella que tal contratación foi realizada dun xeito pouco ortodoxo.
Esta decisión da nova Xunta vai claramente contra o plano de austeridade que Núñez Feijoo quere aplicar a toda a administración galega porque esa cantidade de diñeiro parece ser escandalosa non só polo seu montante senón tamén porque o software libre e de balde ábrese coma un medio para o aforro e o desenvolvemento tecnolóxico sostible da nosa comunidade.
Coidamos que é preciso rendabilizar esforzos que se fixeron arredor dese software libre durante o goberno bipartito, seguir a potenciar distribucións coma Galinux ou apoiar á Universidade de Vigo para que continúe con Trisquel, axudar ás empresas a mudarse a este tipo de programas e a Administración dar exemplo á sociedade galega e implementar estas tecnoloxías, que ademais deixan cartos aquí en Galicia e crean valor engadido de índole intelectual e tecnolóxico. Tamén queremos ser un chisco críticos co anterior goberno da Xunta de Galicia por non ser o suficientemente valente como para apostar clara e decididamente polo software libre en todos os eidos da administración pública galega.
Potenciar o software libre non só é unha cuestión monetaria de aforro, supón tamén un cambio de enfoque axiolóxico, nunha sociedade que debería aspirar a ser cada vez máis libre, fóra dos condicionantes que os programas privativos impoñen aos cidadáns.

A voltas co AVE...

O Plan Galicia elaborado polo PP cando este gobernaba en España e Galicia semellou quedar nunha simple campaña publicitaria con moito cartel polas estradas e anuncios na prensa. En realidade, só era iso, pois non había ningunha previsión de gastos nin unha memoria económica que avalase tal plan. Fume!
Cando o PSOE chegou ao poder en España, por fin foron chegando a Galicia cartos para diferentes obras. Co goberno do PSdeG e do BNG o incremento da inversión autonómica e estatal en infraestructuras foi medrando constantemente. O AVE avanzaba por Castela-León, o tramo Ourense-Santiago e o Eixe Atlántico (Vigo-A Coruña). Mentres tanto, a principal dificultade, o tramo Ourense-Lubián permanecía ancorado ou desprazándose a velocidade de tartaruga entre os diferentes estudos que cómpre realizar antes de aprobar unha obra de tal envergadura. Xurdíu unha data talismán: 2012. No 2012 o AVE estaría cruzando a paisaxe galega e comunicando Galicia co resto de España e Europa a 300 km/h. Moitos técnicos publicaban a súa opinión de que co ritmo de obras sería imposible acadar o final de obra nesa data. O Presidente Touriño seguía a insistir tercamente nesa data coa axuda, ás veces pouco afortunada, da agora ex-ministra de Fomento. O tempo foi pasando e o PSdeG non acadou o goberno galego nas últimas eleccións e houbo un cambio en Madrid. E de súpeto, sen saber como, semella que esa data, o 2012, non era real, que ese AVE case non acadaría os 200 km/h pola nosa terra, un AVE de "Segunda" (ao parecer así constaba no plan de Álvarez Cascos-PP).
Daquela, xurden unhas preguntas: era máis ben unha inquedanza dun político "inocente"( quen non foi capaz de gañar esas eleccións desde o poder) ou é un engano máis que os galegos e as galegas temos que soportar? Coido que noutros lares, tales enganos e vodeviles levarían inexorablemente aos responsables á desaparición parlamentaria. O PSdeG defendeu todo este tempo os verdadeiros intereses de Galicia ou agachou a cabeza diante de Madrid? Por que o PSdeG non ten ese rasgo diferencial dentro do PSOE que ten por exemplo o PSC? Cal foi o papel do BNG neste teatriño? Un convidado de pedra? Vai sacar do caixón do esquecemento o PP un novo Plan Galicia 2 fantasma? Como afectará a crise a todo ese volume de inversión preciso para traer dunha vez por todas a alta velocidade ao Fogar de Breogán?
Confírmase día a día: temos o que merecemos.

Recortes de profesorado en Infantil e Primaria

A Consellería de Educación vén de enviar á Inspección Educativa unhas instrucións nas que dicta o agrupamento de alumnado segundo estes criterios: se hai 20 ou menos alumnos nun ciclo, facer un só grupo; se hai 15 alumnos ou menos en dous ciclos, formar un só grupo cos alumnos dos dous ciclos.
Estas medidas son economicistas, inxustas e van en contra da calidade do ensino público. As zonas máis castigadas serán as zonas rurais, zonas onde é preciso dar mellor calidade educativa se cabe. Reducindo o número de profesores consíguese unha peor atención individualizada ao alumnado.
Esta xente vén coa tesoira recortar no eido público. Dentro de poucas datas virán as prebendas aos centros concertados e privados, que é o que a lles mola.

Que clariño fala...

O mes de maio é o mes das letras galegas. O 17 de maio é o Día das Letras Galegas. O Galego no ensino está nunha encrucillada á espera das decisións políticas que o goberno de Núñez Feijóo vai tomar... Por iso, estas palabras de Belén Regueira na entrega dos premios Mestre Mateo están cheas de sentidiño e de verdade e anímannos a adoitar unha postura máis activa na loita polo dereito e o deber de aprender e de falar Galego en Galicia.

A hora do planeta: 28 de Marzo - 20:30 h.

WWF organiza o 28 de marzo de 2009, de 20:30 a 21:30, A hora do planeta, un apagón voluntario de luz en edificios emblemáticos de cidades e domicilios particulares para concienciarnos sobre o futuro de A Terra, e darlle un aviso aos nosos políticos de que quedan moi poucas oportunidades para adoitar medidas definitivas e globais co gallo de evitar ou paliar o mellor posible o cambio climático que a meirande parte da comunidade científica vén augurando.

Non ao aceite de palma...

Onte vin un reportaxe na canle 24h de TVE pertencente a "El escarabajo verde". Falábase do orangután de Borneo, un primate dunha grande intelixencia que está a sufrir a eliminación do seu hábitat, o bosque tropical, debido, sobre todo, á destrución de dita selva tropical por plantacións de aceite de palma. Dábase a información de que ese aceite está presente no 10% dos produtos dun supermercado no mundo occidental. Unha forma de parar este cambio no hábitat do orangután sería que os consumidores non mercásemos ningún alimento elaborado con este aceite palma. Pero hai un problema. En moitas especialidades, nos ingredientes, figura "aceite vexetal" sen especificar o tipo de semente ou a súa orixe. Temos que esixir que se concrete a clase de aceite vexetal que compón un produto alimentario. Ademais, o aceite de coco e o aceite de palma (de orixe vexetal) son graxas saturadas que elevan a taxa de colesterol nos humanos en oposición ao resto de aceites de orixe vexetal (polinsaturadas e monosaturadas) que ou diminúen a taxa de colesterol ou incrementa o colesterol bo e baixan o colesterol malo.
Así, ademais de protexer o medio ambiente onde se desenvolven estes fermosos e cariñosos orangutáns, protexeremos a nosa saúde cunha boa e sana alimentación.
Ánimo e a esixir a identificación da orixe das graxas vexetais!

Así non...

Non estou en absoluto de acordo coas teses de Galicia Bilingüe, o seu concepto de liberdade de elexir choca contra os meus principios. Non estou de acordo tampouco cos radicais que van contra unha manifestación legalmente convocada e empregan a violencia. Creo na liberdade de pensamento e de expresión, e na tolerancia. Os seguidores de Galicia Bilingüe realizaron unha manifestación pacífica para defender as súas ideas e, aínda que esteamos nas antípodas do seu pensamento, debemos respectalos. Empregando a violencia non se defende o Galego.
O que está claro é que hai unha lei de normalización lingüística aprobada nun parlamento elexido libre e democraticamente e que todos e todas estamos obrigados a cumprir e a Administración ten que velar por que se cumpra. O PP rachou o consenso e, da man de determinados persoeiros, e "persoeiras", pouco recomendables, está a acender a mecha dunha guerra pola lingua que aquí nunca existiu e vai perder determinado voto galeguista que aínda lle quedaba nalgunhas zonas de Galicia. Onde está esa parte do PP con enfoque galeguista? Pode que agochados ata que o temporal amaine?
A violencia nunca é boa compañeira. Podemos defender o Galego activamente empregándoo en todas a situacións, esixindo o seu uso cando non se cumpra a lei, apoiando as iniciativas empresariais e cidadás que empregan e queren potenciar a nosa lingua. O Galego sufriu corenta anos de asoballamento e aínda hoxe vive unha situación preocupante. Non lle deamos argumentos doutro tipo a quen quere, no fondo, restaurar o totalitarismo lingüístico e o estado centralista.

Diferenza entre sono e soño

En Galego diferenciamos sono e soño... Hoxe escoitamos dicir a unha deputada ourensá nun mitin: "Hai 45 anos, Martin Luther King tivo un sono..." Repetíu esta palabra así empregada varias veces. Imaxinamos que o señor Luther King tería sono todos os días da súa vida, agás que os problemas que vivíu e que tentou resolver sacáranllo algunha noite... Seguro que tivo un soño, ese soño polo que loitou e que chegou a ser realidade. Ademais, o señor Obama tamén verá cumprido o seu "soño", un "soño" compartido con moitos cidadáns e moitas cidadás de Estados Unidos, o próximo 20 de xaneiro.
É salientable a frescura desta oradora no seu discurso, lido, por certo. Pois xa que le, pregámoslle que suba o seu nivel de esixencia lingüística para ser precisa na súa expresión, dignificar o Galego e non confundir sono con soño. O seu xefe utilizou despois dela correctamente este termo: "un soño..."
A pesares de todo, desexamos que o cambio en Galicia poida seguir avanzando outros catro anos, para que sexa máis profundo e que se note un chisco máis en todos os aspectos da vida das galegas e dos galegos.